Hugguleg tónlistarhátíð á Rauðasandi í byrjun júlí

Rauðasandur Festival er tónlistarhátíð sem haldin verður í náttúruparadísinni á Rauðasandi í júlí. Þetta er í fyrsta skipti sem hátíðin er haldin.

„Við viljum hafa þetta rólega og huggulega hátíð þar sem fólk getur komið og skemmt sér og notið lífsins í fallegri náttúru,“ segir Björn Þór Björnsson, einn skipuleggjenda nýrrar tónlistarhátíðar sem haldin verður á Rauðasandi á Vestfjörðum 6.–8. júlí næstkomandi.

Björn Þór stendur að hátíðinni ásamt vinum sínum Kristínu Andreu Þórðardóttur, Jónínu de la Rosa og Hirti Matthíasi Skúlasyni. Sá síðastnefndi ólst upp á Rauðasandi og verður hátíðin haldin á bóndabæ bróður hans að Melanesi. „Rauðasandur er stórfenglegur staður og eins og úr öðrum heimi. Maður tekur alveg andköf við að koma þangað,“ segir Björn Þór. Síðasta sumar ákváðu fjórmenningarnir að slá upp hálfgerðri prufuhátíð á staðnum og buðu vinum sínum og vandamönnum að koma. Það gekk stórvel að sögn Björns Þórs og hófust þau strax handa við að skipuleggja almennilega hátíð fyrir þetta sumar.

Mikil áhersla verður lögð á kántrýtónlist, blues og aðra órafmagnaða tónlist og meðal þeirra sem fram koma eru Lay Low, Prinspóló, Low Roar, Johnny Stronghands, Jefferson Hamer, Snorri Helgason, Ylja og Smári Tarfur. Tjaldaðstaða er góð á svæðinu en tónleikarnir verða haldnir í hlöðu á Melanesi. „Við erum að smíða svið í hlöðunni svo þetta verður alvöru hlöðuball,“ segir Björn Þór.

Það verður þó meira í boði en tónleikar því á dagskránni eru alls kyns uppákomur. „Sandurinn er aðalmálið þarna svo við verðum með sandkastalakeppnir, jóga í sandinum og fleira í þeim dúr,“ segir Björn Þór og hvetur fólk til að taka börnin með sér. „Þetta er lágstemmd og fjölskylduvæn hátíð þar sem mikil og skemmtileg dagskrá er í boði fyrir alla aldurshópa og fólk kemur til að njóta,“ segir hann að lokum. Miði á hátíðina kostar 6.500 krónur og má nálgast á midi.is.

tinnaros@frettabladid.is