Ætlar að toppa síðustu tónleika

„Þetta verður alveg geggjað. Ég held að við toppum þetta frá því í fyrra," segir Helgi Björnsson.

Hann ætlar að endurtaka leikinn á þjóðhátíðardaginn og halda tónleika í Eldborg 17. júní undir nafninu Íslenskar dægurperlur. Þar mun stórskotalið íslenskra söngvara stíga á svið og flytja þekkt íslensk popplög undir stjórn Samúels J. Samúelssonar. Hann hefur sér til fulltyngis vaska sveit tónlistarmanna, þar á meðal lúðra- og fiðlusveit.

Meðal söngvara í ár verða Valdimar Guðmundsson, Ragnhildur Gísladóttir, Sigríður Thorlacius, Jón Jónsson og þau Eivör og Bogomil Font sem komu einnig fram í fyrra.

„Stemningin var svo góð í fyrra að það ætlaði bókstaflega að kvikna í húsinu," segir Helgi og hlær. Þá fór einmitt brunavarnarkerfið í gang þegar lagið Brennið þið vitar var flutt. „Núna verða væntanlega áttatíu slökkviliðsmenn á vakt til að vera með þetta allt á hreinu." Kynnir og skemmtanastjóri verður myndlistarmaðurinn Ragnar Kjartansson. Miðasala hefst í apríl.

Geisla- og mynddiskur með tónleikunum kom út fyrir jólin í fyrra og hefur hann náð gullsölu, eða fimm þúsund eintökum. Tónleikarnir í sumar verða einnig teknir upp en ekki hefur verið ákveðið hvort þeir verða gefnir út. -fb