Ajax vill fá til sín alla leikmenn AG Kaupmannahafnar

Svo gæti farið að leikmenn AG Kaupmannahafnar færi sig allir yfir til Ajax, elsta handboltafélags í Danmörku. Það er í það minnsta draumur forráðamanna Ajax sem sendu frá sér fréttatilkynningu í dag.

Íslensku landsliðsmennirnir Snorri Steinn Guðjónsson og Arnór Atlason eru meðal þeirra sem eru án félags eftir að AG Kaupamannhöfn fór á hausinn.

Ajax er reyndar í dönsku b-deildinni og kemst því ekki í úrvalsdeildina fyrr en í fyrsta lagi 2013/2014 og þar með ekki í Evrópukeppnina fyrr en í fyrsta lagi 2014/2015. Það hljómar örugglega ekki alltof spennandi fyrir leikmenn AG sem eru vanir því að keppa meðal þeirra bestu.

Forráðamenn Ajax ætla byrja á því að bjóða leikmönnum AG að æfa með félaginu á meðan framtíð þeirra kemst á hreint. Þjálfari liðsins er Christian Dalmose. Í fréttatilkynningunni kemur fram að Ajax sé að leita sér að styrktaraðilum, stórum og litlum, og að félagi ætli að fylla skarðið sé AG skilur eftir sig í höfuðborginni.