Steingrímur Sævarr sýknaður í meiðyrðamáli

Steingrímur Sævarr Ólafsson, ritstjóri vefmiðilsins Pressunnar, var í Héraðsdómi Reykjavíkur í dag sýknaður af ásökun um meiðyrði í garð Ægis Geirdal listamanns. Ægir fór fram á eina milljón í miskabætur frá ritstjóranum en dómarinn ákvað að hann skyldi í staðinn greiða Steingrími 180 þúsund krónur í málskostnað.

Ægir krafðist þess að sex ummæli, þar sem hann var sakaður um kynferðisbrot, yrðu dæmd dauð og ómerk. Ummælin á vefmiðlinum birtust frá því í nóvember árið 2010 þar til í maí 2011. Tvær systur stigu fram í kjölfar þess að Ægir bauð sig fram til setu á stjórnlagaþingi og sökuðu hann um að hafa misnotað sig þegar þær voru börn. Ægi hafnaði þessum ásökunum og hótaði bæði þeim og Pressunni lögsókn. Ekkert hefur þó orðið af málshöfðun á hendur systrunum.

Ægir krafði Steingrím Sævar um eina milljón króna í miskabætur og 200 þúsund krónur að auki til að kosta birtingu dómsins. Steingrímur neitaði sök í málinu.