"Ef þú vilt ekki blotna þá áttu ekki að fara í sund“

Nokkuð rólegra var á skjálftasvæðinu út af Norðurlandi í gærkvöldi og í nótt en fylgst er náið með stöðunni. Prófessor í byggingarverkfræði segir að Íslendingar sem og aðrir að skjálftasvæðum verði að vera vel undirbúnir skjálftum.

Síðasti skjálfti á Norðurlandi sem náði þremur stigum var rétt fyrir klukkan átta í gærkvöldi en fyrir utan hann hefur enginn skjálfti mælst stærri en þrjú stig síðan á fimmtudagsmorgun. Skjálftarnir eiga flestir upptök sín vestan megin á skjálftasvæðinu nær Siglufirði þar sem stóri skjálftinn varð fyrir tæpri viku síðan. Vísindamenn veðurstofunnar fylgjast náið með þróuninni í samstarfi við Almannavarnir og er óvissustig enn í gildi.

Jarðskorpumælingar svissneska jarðfræðingsins Sabrinu Metzger á svæðinu undanfarin ár benda til þess að nægileg spenna sé til staðar fyrir stóran skjálfta - jafnvel af stærðinni 6,8 sem er álíka mikið og varð í Christchurch á Nýjasjálandi í fyrra og olli þar miklu manntjóni og eyðileggingu.

Það skal þó tekið skýrt fram að sérfræðingar segja að skjálfti af þessari stærð myndi ekki valda skaða hér á landi í námunda við það sem þar varð meðal annars vegna þess hve gjör ólíkar jarðskorpurnar eru.

Þá eru íslenskar byggingar mjög stekar. Ólafur H. Wallevik, forstöðumaður grunnrannsókna við Nýsköpunarmiðstöð Íslands og prófessor í byggingaverkfræði við Háskólann í Reykjavík og Sherbrooke háskóla í Kanada, hefur mikið dvalist í Christchurch eftir skjálftanna og skoðað byggingar.

„Það sást aðallega að þau hús sem fóru í sundur, þau voru fjórar hæðir eða meira. Við erum svolítið heppin, því á okkar jarðskjálftasvæðum höfum við mjög lítið af slíkum háum húsum," segir hann.

Hann segir reynslu sína þaðan sýna mikilvægi þess að mjög sé vandað til bygginga og þær séu ekki hafðar mjög háar á jarðskjálftasvæðum. Líka á svæðum sem eru ekki á mesta jarðskjálftasvæðinu heldur í námunda við það rétt eins og Christchurch. Þetta megi íbúar á Reykjvíkursvæðinu hafa í huga sem eru í námunda við mjög virkt jarðskjálftasvæði, það er að segja Hveragerði.

„Ef maður býr á jarðskjálftasvæði þá verður maður að gera ráð fyrir því að maður lendir í einum stórum. Ef þú vilt ekki blotna þá áttu ekki að fara í sund," segir hann.