Frakkar með fullt hús stiga eftir sigur gegn Túnis

Ólympíumeistaralið Frakka lagði Túnis að velli, 25-19, í A-riðli handboltakeppninnar í karlaflokki á ÓL í London í morgun. Staðan var 12-11 fyrir Frakkland í hálfleik. Daniel Narcisse skoraði 7 mörk fyrir Frakka og Amine Bannour var markahæstur í lið Túnis með 5.

Frakkar hafa þar með unnið alla þrjá leiki sína í A-riðli en liðið er í riðli með Íslendingum sem mæta Svíum í kvöld kl. 20.15. Svíar og Íslendingar hafa unnið báða leiki sína á ÓL en íslenska liðið gjörsigraði Túnis 32-22.

Fjögur efstu liðin í A-riðli komast í átta liða úrslit keppninnar.