Fyrrverandi forstjóri Baugs þarf að greiða 1,7 milljarða

Gunnar Sigurðsson, fyrrverandi forstjóri Baugs, var í dag dæmdur til að greiða þrotabúi BGE eignarhaldsfélags 1,7 milljarða króna. Dómur þessa efnis var kveðinn upp í Héraðsdómi Reykjavíkur í dag.

Aðalmeðferðferð fór fram í málinu í lok október. Málavextir eru þeir að BGE eignarhaldsfélag var sérstaklega stofnað í nóvember 2003 til að halda utan um kaupréttarsamningakerfi starfsmanna Baugs en það var hannað af KPMG. Kerfið virkaði þannig að Kaupþing lánaði Baugi gegn veði í hlutabréfum félagsins og Baugur lánaði féð síðan áfram til starfsmanna Baugs.

Starfsmenn Baugs fengu lánað fyrir hlutabréfum sem þeir máttu svo selja á ákveðnum tímum. Sjálfir vildu þeir meina að þeir væru ekki persónulega ábyrgir fyrir lánunum. Þessu var skiptastjóri þrotabúsins ósammála. Héraðsdómur Reykjavíkur féllst á þann skilning þrotabússtjóra með dómi í dag.