Borgun semur við kínverskan kreditkortarisa

Borgun hf. hefur gert samning við kínverska kreditkortarisann Union Pay og býður nú viðskiptavinum sínum upp á færsluhirðingu á hinum kínversku kortum. Til þessa hefur íslenskum þjónustuaðilum ekki verið fært að taka á móti kortum frá Kína. Þetta kemur fram í tilkynningu frá Borgun.

Union Pay eru mest notuðu kortin í Kína en með vaxandi hagvexti og farsæld í Kína fjölgar stöðugt þeim Kínverjum sem ferðast erlendis. Erlend fyrirtæki eru nú þegar farin að aðlaga og auka þjónustu sína við kínverska ferðamenn og sjá strax mikinn árangur í aukinni veltu.

Kínverjar eyða jafnframt að jafnaði hærri upphæðum á ferðalögum en erlendir ferðamenn að jafnaði og því er ljóst að talsverðir hagsmunir eru í húfi fyrir þjónustuaðila hérlendis.

Samkvæmt upplýsingum frá Alþjóðaferðamálastofnuninni (UNWTO) er gert ráð fyrir því að árið 2020 muni 100 milljónir Kínverja ferðast erlendis. Gert er ráð fyrir að fjöldi Kínverja sem ferðast til Evrópu fjórfaldist á milli áranna 2011 og 2020 og verði um 20 milljónir.

Árið 2010 komu rúmlega 5000 kínverskir ferðamenn til Íslands en íslensk yfirvöld hafa markvisst unnið að því undanfarin ár að kynna Ísland fyrir Kínverjum sem áhugaverðan áfangastað. Sem dæmi er vefsíðan visiticeland.com nú aðgengileg á kínversku.

Borgun hf. leggur áherslu á að seljendur geti tekið við öllum kortum og náð þannig öllum þeim viðskiptum sem kunna að bjóðast og er þessi nýjung því kærkomin viðbót við þjónustu Borgunar.

Í dag eru 2,2 milljarðar Union Pay greiðslukorta í notkun en kortin eru gefin út í 16 löndum í Asíu. Hvarvetna sýnir reynslan að Union Pay korthafar nota kortið mikið og er meðalfjárhæð færslu hærri en meðalfjárhæð korthafa annarra algengra alþjóðlegra korta og álíka og American Express korta. Því má fullyrða að Union Pay korthafar séu eftirsóknarverðir viðskiptavinir fyrir íslenska þjónustuaðila.