Formaður stjórnar FME: Niðurstaða ljós snemma í næstu viku

„Við erum með mál er tengist athugun á hæfi forstjóra Fjármálaeftirlitsins til umfjöllunar," sagði Aðalsteinn Leifsson, formaður stjórnar Fjármálaeftirlitsins, í samtali við fréttastofu, aðspurður um þá ákvörðun stjórnar FME að segja Gunnari Andersen, forstjóra FME, upp störfum. Gert er ráð fyrir að endanleg ákvörðun varðandi Gunnar liggi fyrir snemma í næstu viku. Aðalsteinn vildi ekkert tjá sig um þá ákvörðun stjórnar FME að segja Gunnari upp störfum, þegar eftir því var leitað. Hann vildi ekki staðfesta uppsögnina, eða ræða efnislega um ákvörðunina.

Gunnar Andersen, forstjóri Fjármálaeftirlitsins (FME), hefur andmælarétt til lok dags á mánudaginn, vegna þeirrar ákvörðunar stjórnar FME um að segja honum upp störfum. Samkvæmt heimildum fréttastofu tilkynnti Aðalsteinn Leifsson, formaður stjórnar FME, Gunnari fyrir hönd stjórnarinnar um þá ákvörðun að segja honum upp störfum, og bauð honum að gera það í sátt við hann. Það var Gunnar ekki tilbúinn til þess að gera, og í kjölfar formlegrar beiðni lögmanns Gunnars, Skúla Bjarnasonar hrl., um frekari rökstuðning fyrir ákvörðuninni, varð úr að Gunnar fengi frest til lok dags á mánudag, til þess að andmæla ákvörðuninni með lagalegum rökum.

Eins og greint var frá á Vísi fyrr í kvöld var ákvörðun stjórnar FME tekin eftir að Ástráður Haraldsson hrl. og Ásbjörn Björnsson endurskoðandi höfðu skilað skýrslu til stjórnar FME um aðkomu Gunnars að aflandsfélögum, þegar hann starfaði hjá Landsbankanum, og hæfi hans til þess að gegna starfi forstjóra.

Með Aðalsteini í stjórn Fjármálaeftirlitsins sitja Ingibjörg Þorsteinsdóttir, dósent, og Arnór Sighvatsson, aðstoðarseðlabankastjóri.

Andri Árnason hrl. hafði í tvígang verið fenginn til þess að meta hæfi Gunnars, eftir að upplýsingar komu fram, m.a. í Kastljósi RÚV, þess efnis að hann hefði komið að starfsemi aflandsfélaga Landsbankans á þeim tíma er hann starfaði þar, sem var á árunum 1991 til 2003. Ástráður og Ásbjörn voru síðan fengnir til þess að fara yfir síðara mat Andra, og draga fram nýjar upplýsingar eftir því sem þörf var á.

Gunnar var ráðinn forstjóri FME 3. apríl 2009 og var þá valinn úr hópi 19 umsækjenda.

Frekari upplýsingar um málið koma hér inn á Vísi eftir því sem upplýsingar um málið beras