Var "fasteignasali“ leiddur út úr pókerklúbb í járnum?

Fyrir skömmu birtust fjórar fréttir í fjölmiðlum um aðkomu fasteignasala að refsiverðri háttsemi. Fyrsta fréttin varðaði fasteignasala sem hafði verið handtekinn í spilavíti sem hann hafði rekið og verið leiddur út í járnum vegna mótþróa. Næst birtist frétt um fasteignasala sem hafði komið nærri peningaþvætti og var grunaður um stórfelld fjármunabrot. Því næst var komið að fréttaflutningi um fasteignasala sem hafði verið höfuðpaurinn í alvarlegum fjársvikum gagnvart Íbúðalánasjóði og dæmdur í þriggja og hálfs árs fangelsi, en þessi fjársvik tengdust Hells Angels-samtökunum. Þá var komið að fréttum um fasteignasala sem hafði verið dæmdur í tveggja ára fangelsi fyrir blekkingar.

Ekki er langt síðan viðamikil umfjöllun birtist um mann sem hafði gerst sekur um alvarleg kynferðisbrot auk stórfelldra líkamsmeiðinga og hlotið langan refsidóm fyrir þau svívirðilegu brot. Í öllum þessum tilvikum þótti sérstaklega fréttnæmt að viðkomandi væri fasteignasali.

Eitt er þó sammerkt öllum þeim fréttum sem hér að framan eru nefndar. Enginn þessara aðila er fasteignasali né hefur nokkru sinni verið það! Ekki þarf að fjölyrða að hver einasta sérfræðistétt á landinu ætti erfitt með að una svo röngum fréttaflutningi, þar sem orðspor og virðing skiptir allar sérfræðistéttir miklu.

Starfsheitið fasteignasali er lögverndað starfsheiti og enginn má kalla sig fasteignasala eða koma fram sem slíkur nema hann hafi löggildingu til þess á grundvelli menntunar, reynslu og óflekkaðs mannorðs auk ýmissa annarra strangra skilyrða. Það að einhver þeirra aðila sem að framan greinir kunni að hafa einhvern tímann unnið sem aðstoðarmaður (sölumaður) er víðs fjarri því að viðkomandi sé eða hafi verið fasteignasali.

Listi yfir alla fasteignasala og myndir af þeim má sjá inni á heimasíðu Félags fasteignasala, ff.is. Þá má geta þess að allir fasteignasalar hafa skírteini á sér sem ber með sér hvort þeir eru fasteignasalar eða löggiltir fasteignasalar, sem rétt er að geta að er alveg það sama. Misbeiting á að aðilar séu kynntir sem fasteignasalar án þess að vera það varðar refsingu skv. lögum. Stjórn og framkvæmdastjóri FF; Ingibjörg Þórðardóttir, Ágústa Hauksdóttir, Einar Páll Kjærnested, Kjartan Hallgeirsson, Viðar Böðvarsson, Sigrún Stella Einarsdóttir, Sigurbjörn Skarphéðinsson, Grétar Jónasson.