Viðræður hafnar um að lengja í skuldabréfi Landsbankans

Viðræður um að lengja í lánum nýja landsbankans gagnvart þrotabúi gamla Landsbankans eru hafnar og vonast Már Guðmundsson seðlabankastjóri til þess að áhættu fyrir íslenskt efnahagslíf verði eytt. Hann segir að útgreiðslur til kröfuhafa gömlu bankanna muni ekki fara fram nema að fjármálastöðugleiki sé að fullu tryggður.

Már Guðmundsson seðlabankastjóri segir að staða íslenska þjóðarbússins hafi breyst mjög til batnaðar frá hruni fjármálakerfisins fyrir rúmum fjórum árum, og þar hafi aðgerðir í ríkisfjármálum ekki síst skipt máli. Hann segir þó að enn sé fyrir hendi vandamál sem mikilvægt sé að leysa, ekki síst er snúa að greiðslujöfnuði landsins, það er fjárflæði til og frá landinu, frekar en skuldastöðunni sem sé viðráðanlegri.

„Ef við myndum hleypa öllu út, þá sérstaklega aflandskrónunum sem eru hlut af okkar skuld vegna þess að þær eru kröfur aðallega á ríkissjóð, þá hefði það alvarleg áhrif á gengisstöðugleika og að einhverju leyti á fjármálastöðugleika. Það er vandinn," segir Már.

Már segir að þegar séu hafnar viðræður við kröfuhafa um gjaldeyrisskuld nýja Landsbankans við þrotabú gamla Landsbankans, en gert er ráð fyrir að bankinn þurfi að greiða þrotabúinu að meðaltali 72 milljarða á ári í fjögur ár eftir árið 2014. Már segir að nauðsynlegt sé að endursemja um þessa greiðslubyrði.

„Hún getur orðið nokkuð þung, sérstaklega eftir árin 2014 þegar kemur að skuldabréfi milli nýja og gamla Landsbankans, þar sem er verið að greiða niður skuldir of hratt að okkar mati, og það þarf að lengja í því. Það eru hafnar viðræður um þetta skuldabréf, og ég er vongóður um það að það náist góð niðurstaða í það, og það verði lengt verulega í því," segir Már.

Már segir ennfremur að nauðasamningar við kröfuhafa Glitnis og Kaupþings verði ekki samþykktir nema að uppfylltum skilyrðum.

Við munum ekki samþykkja eitt eða neitt nema að það sé búið að búa um hnútana þannig að okkar greiðslujafnaðarvandi, ekki skuldavanti, aukist ekki," segir Már.