Keflvíkingar búnir að reka Kristoffer Douse

Miðherjinn Kristoffer Douse hefur leikið sinn síðasta leik fyrir Keflvíkinga en karfan.is segir frá því að körfuknattleiksdeild Keflavíkur hafi sagt upp samningi hans. Douse stoppaði stutt við á Íslandi því hann kom til liðsins í lok janúar.

Kristoffer Douse byrjaði á bekknum í sínum síðasta leik þegar Keflavík vann 101-100 sigur á Snæfell en þar var einmitt íslenski miðherjinn Almar Stefán Guðbrandsson sem skoraði sigurstigið í leiknum.

Kristoffer Douse skoraði 9,5 stig og tók 4,2 fráköst að meðaltali á 20 mínútum í þeim sex deildarleikjum sem hann lék með Keflavík. Douse var með 10 stig og 5 fráköst í sigrinum á Tindastól í bikarúrslitaleiknum.

Kristoffer Douse var með kanadískt og breskt vegabréf og geta Keflvíkingar því ekki fengið mann í staðinn fyrir hann því félagsskiptaglugginn er lokaður.