ViðskiptiNáist samningar milli Orkuveitu Reykjavíkur (OR), lífeyrissjóðanna og Norðuráls verður lagt upp í gerð Hverahlíðarvirkjunar með svokallaðri verkefnafjármögnun. Selja á orku úr virkjuninni til álvers Norðuráls í Helguvík.
Samkvæmt heimildum Fréttablaðsins fengu OR og Norðurál KPMG til þess að leita lausna á þeim hnút sem orkuöflun til virkjunarinnar var komin í.
Í fyrra komst gerðardómur að því að orkusamningar Norðuráls og HS Orku skyldu standa. Hugur OR mun ekki hafa staðið til að fara sömu leið með samninga sína við Norðurál.
KPMG hefur þegar kynnt stjórn OR hvernig ráðast mætti í gerð virkjunarinnar með því að stofna um hana sérstakt félag, sem að stærstum hluta yrði í eigu lífeyrissjóðanna.
Herma heimildir blaðsins að Norðurál sé opið fyrir viðræðum og lífeyrissjóðirnir jákvæðir fyrir fjármögnun.
Síðastliðinn föstudag kynnti svo forstjóri OR málið fyrir sveitarstjórnarmönnum sveitarfélaga sem að OR standa.
Verði af verkefninu gangast Orkuveitan og eigendur hennar ekki í ábyrgðir vegna lána tengdum verkefninu.
Orkuveitan sér hins vegar um byggingu og rekstur virkjunarinnar samkvæmt samningi þar að lútandi. Orkuveitan á jafnframt jarðhitasvæðið, en leigir félaginu nýtingarrétt. - óká
Lífeyrissjóðir fjármagni virkjun
