Fossvogskirkjugarður er áttræður

Fossvogskirkjugarður fagnar 80 ára afmæli sínu þetta árið og því verður boðið til hátíðarguðsþjónustu í Fossvogskirkju á sunnudaginn næsta.

Vígsla Fossvogskirkjugarðs 2. september 1932 markaði nýtt upphaf fyrir Kirkjugarða Reykjavíkur. Á þessum árum þótti sýnt að Hólavallakirkjugarður í Vesturbænum væri að fyllast. Þá lögðu menn í leit að nýju svæði undir kirkjugarð. „Og menn fundu Fossvogskirkjugarð. En þá var hann náttúrlega langt úti í sveit. Mörgum þótti hann allt of langt frá miðað við að Hólavallagarður hafði verið nánast við þröskuldinn," segir Þórsteinn Ragnarsson, forstjóri Kirkjugarða Reykjavíkurprófastsdæma.

Kirkjugarðurinn var lítill í upphafi, minni en Hólavallakirkjugarður, en stækkaði smám saman og er nú 28,2 hektarar.

Í hátíðarguðsþjónustunni prédikar vígslubiskupinn sr. Kristján Valur Ingólfsson og Ögmundur Jónasson, innanríkisráðherra, flytur ávarp. Vönduð tónlistaratriði munu glæða guðsþjónustuna lífi og loks verður farið í gönguferð um elsta hluta kirkjugarðarins og boðið upp á kaffi.