Jón Arnór hefur hitt úr öllum vítunum sínum í vetur

Jón Arnór Stefánsson hefur verið að spila vel að undanförnu með CAI Zaragoza í spænsku úrvalsdeildinni í körfubolta og hefur skorað 39 stig í síðustu þremur leikjum liðsins.

Jón Arnór skoraði 15 stig í sigri Zaragoza á Joventut um helgina. Vítanýting Jóns Arnórs vekur sérstaka athygli því hann hitti úr öllum 5 vítum sínum í leiknum um helgina og er því áfram með hundrað prósent vítanýtingu í spænsku deildinni í vetur.

Jón Arnór hefur fengið 18 víti og hitt úr þeim öllum. Hann var með 86 prósent vítanýtingu með Granada á síðasta tímabili. Jón Arnór setti þá niður 42 af 49 vítum sínum.