Þorsteinn Már: Afar krefjandi tímar framundan í sjávarútvegi

Þorsteinn Már Baldvinsson, forstjóri Samherja, segir að afar krefjandi verði fyrir íslensks sjávarútvegsfyrirtæki að selja vöru á alþjóðamörkuðum á næstunni vegna fólk erlendis hafi mun minna milla handanna en áður. Nýleg aukning á þorskkvóta í Barentshafi, sem Rússar og Norðmenn njóta, geti einnig haft mikil áhrif hér á landi.

Þó afkomutölur íslenskra sjávarútvegsfyrirtækja, einkum þeirra stærri, hafi sjaldan litið betur út en undanfarin tvö ár, hafa aðstæður á alþjóðamörkuðum farið versnandi undanfarin misseri. Þorsteinn Már Baldvinsson, forstjóri og einn af stærstu eigendum Samherja, sem skilaði hagnaði í fyrra upp á tæpa níu milljarða króna, að dótturfélögum meðtöldum, segir blikur vera á lofti á mörkuðum, sem geti haft mikil áhrif á íslenskan sjávarútveg.

„Við sjáum nú þegar verðlækkanir á mörkuðum, og það þekkja allir hvernig staða efnahagsmála er í Grikklandi, Portúgal, Spáni og Ítalíu, en það hafa verið stórir markaðir fyrir íslenskan fisk. Þar er sölutregða farin að gera vart við sig, enda er þetta dýr gæðavara á mörkuðum," segir Þorsteinn Már.

Hann segir að nýlegar ákvarðanir um stórauknar aflaheimildir í Barentshafi, geti haft mikil áhrif á sölu á íslenskum fiski á erlendum mörkuðum.

„Þorskkvóti í Barentshafi var aukinn um 250 þúsund tonn, en til samanburðar þá voru 170 þúsund tonn veidd á Íslandsmiðum í fyrra. Aukningin ein og sér er því 50 prósent meiri en sem nam heildarafla í fyrra við Ísland. Þetta getur haft mikil áhrif á íslenskan sjávarútveg, þar sem erfiðara verður að selja fiskinn á mörkuðum vegna harðnandi samkeppni, ekki síst frá Noregi og einnig frá Rússlandi."

Aðspurður hvort að búast megi við því að birgðir af fiski geti farið að safnast upp, vegna sölutregðu á mörkuðum, segist hann fastlega búast við því að svo verði.

„Það er nú þegar komin upp sölutregða og salan er orðin erfiðari og meira krefjandi en áður. Ég hef trú á því að birgðasöfnun komi upp já. Íslenskur sjávarútvegur mun þurfa að einblína á söluna á næstu misserum, og sjávarútvegurinn og stjórnvöld þurfa að vinna saman að því að efla markaðs- og sölustarfið, því það er mikið í húfi, vegna mikilvægis sjávarútvegs fyrir efnahag landsins," segir Þorsteinn Már.