Tíu milljarðar í fjárfestingu og störf

Ríkisstjórnin ætlar að leggja tíu milljarða til að efla fjárfestingu og skapa störf á næsta ári. Verkefnin verða fjármögnuð meðal annars með arðgreiðslum frá fjármálafyrirtækjum, en þingmaður Sjálfstæðisflokks óttast að hér sé um innantóm loforð að ræða.

Fjármála- og efnahagsráðherra og varaformenn stjórnarflokkanna kynntu á blaðamannafundi í morgun þau verkefni sem eiga hefjast næsta ári.

750 milljónir fara í ferðaþjónustu, 920 milljónir í skapandi greinar, rúmur milljarður í græna hagkerfið og sjö og hálfur milljarður í vega- og byggingarframkvæmdir. Þar á meðal verður einum milljaðir varið til uppbyggingar á nýju fangelsi á Hólmsheiði og 800 milljónum í hús íslenskra fræða sem á rísa við Þjóðarbókhlöðuna.

Svo er það náttúruminjasafn Íslands, sem hefur verið meira og minna á vergangi frá stofnun árið 2007. Það er nú til húsa í gömlu loftskeytastöðinni en getur ekki haldið sýningar sökum plássleysis. 500 milljónum verður varið í að koma upp sýningaaðstöðu í Perlunni.

„Við höfum verið að skoða Perluna sem valkost með Reykjavíkurborg. Við erum ekki búin með þá skoðun en okkur fannst mikilvægt að sýna þá áherslu að við viljum koma á laggirnar náttúruminjasýningu á vegum safnsins og horfum til þess að þetta sé fyrsti áfanginn í því en þeirri skoðun ætti að ljúka á næstu vikum," segir Katrín Jakobsdóttir, mennta- og menningarmálaráðherra.

Verkefnið verður fjármagnað annars vegar með tekjum af veiðileyfagjaldi og hins vegar með arði og eignasölu.

„Þetta mun hafa veruleg áhrif til innspýtingar, þetta mun fjölga störfum, þessu er ætlað að skapa hér vöxt í samfélaginu, breikka tekjustofnana og skila okkur skatttekjum til baka og sterkari tekjustofnum," segir Katrín Júlíusdóttir, fjármála- og efnahagsráðherra.

Kristján Þór Júlíusson, þingmaður Sjálfstæðisflokks, segir að þjóðinni veiti ekki af innspýtingu af þessu tagi.

„En loforðalisti ríkisstjórnarinnar er langur án innistæðna og það er ábyrgðarleysi að kynna svona áætlun ef það er ekki ætlunin að fylgja henni eftir eða þá það er ekki innistæða fyrir henni - því miður þá er þetta ekki nægilega vel tryggt."