Netþrjótar ætluðu að svindla á lögreglumanni

„Nei, kannski ekki í þessu tilfelli en því miður eru sumir sem bíta á svona agn," segir Ásgeir Karlsson, yfirmaður hjá Greiningardeild Ríkislögreglustjóra, þegar hann spurður hvort að hann sé kannski ekki heppilegasti maðurinn til að reyna að svindla á.

Ásgeir fékk símtal frá netsvindlara á dögum, sem reyndi að blekkja hann til að setja forrit í tölvuna hjá sér. Hann var í viðtali við þáttinn Reykjavík síðdegis á Bylgjunni í dag.

„Það er kona sem hringir í mig og talar við mig ensku. Hún sagðist vera frá þjónustuveri Microsoft og að það væri vírus í tölvunni hjá mér - og bauðst til að laga það á meðan ég væri á línunni. Ég áttaði mig strax á því að þetta væri svindl, þetta var mjög vel undirbúið því ég heyrði í fólki í bakgrunninum, eins og þetta væri þjónustuver og þar var fólk að tala um Microsoft," segir Ásgeir.

„Ég sagði strax við hana, trúir þú því virkilega að ég gleypi við þessu? Þá bregst hún þannig við og segir afhverju ekki? Þegar ég fór að útskýra það að þá skellir hún á mig," segir hann en konan hringdi úr leyninúmeri.

„Ég sá nú eftir því að hafa ekki leikið á hana, og látið hana leiða mig inn í þetta - og segja svo við hana í lokin að ég væri nú lögreglumaður og væri komin vel á veg að rekja hvaðan hún hringdi. Ég áttaði mig ekki á því nógu snemma. Plottið er trúlega það að opna fyrir gátt inn í tölvuna til mín, þá er hún komin með forrit og getur séð hvað ég er að gera."

„Þetta er grafalvarlegt mál. Ég er nokkuð viss að hún hafi hringt að utan því ef maður skoðar aðvörun frá Microsoft, þá er þetta þekkt svindl. Þeir sendu frá sér yfirlýsingu í fyrra þar sem þeir vöruðu við þessu."