Hætta framleiðslu á vinsælu geðklofalyfi

Magnús Haraldsson, geðlæknir á Landspítalanum, segir það grafalvarlegt mál að lyfjaframleiðandinn Merck Sharp & Dome (MSD) ætli að hætta framleiðslu á geðklofalyfinu perfenazíni (Trilafon) í töfluformi. Um gamalt og vinsælt geðlyf sé að ræða, sem um leið sé eitt það ódýrasta á markaðnum og sé notað af hundruðum Íslendinga í dag með góðum árangri.

„Lyfið er óumdeilanlega góður kostur við meðferð geðklofa og það er ekki hægt að fullyrða að nýrri lyf séu almennt betri,“ segir Magnús. Hann segir lyfið í raun það eina í sínum flokki sem hafi staðið sig svo vel í samkeppninni við nýrri lyf í langtímameðferð að það er enn í mikilli notkun hér á landi.

MSD gaf þá útskýringu vegna framleiðslustoppsins annars vegar að aðrir meðferðarmöguleikar væru í boði og hins vegar að framleiðsla lyfsins væri flókin.

„Það er erfitt að sjá hvers vegna framleiðslan ætti að vera flóknari í dag en fyrir rúmum 40 árum þegar lyfið kom fyrst á markað,“ segir Magnús. „Við hljótum þá að spyrja um ábyrgð lyfjaframleiðenda þegar lyf sem sannanlega er sýnt fram á að séu góður valkostur við alvarlegum sjúkdómum er nær fyrirvaralaust tekið af markaði.“

Ekkert samheitalyf verður sett formlega á markað eftir að Trilafon fer af markaði hér í byrjun næsta árs, en læknar geta sótt um undanþágulyfseðil hjá Lyfjastofnun vegna samheitalyfja fyrir sjúklinga sína. „Þetta getur verið meiriháttar mál fyrir fleiri hundruð einstaklinga sem hafa verið að nota þetta lyf lengi,“ segir Magnús.

Arnþrúður Jónsdóttir, sölu- og markaðsstjóri MSD á Íslandi, segir að samheitalyfið, sem er framleitt af Orion Pharma, hafi sama virka efni og Trilafon. Lyfjastofnun hafi gefið fyrirheit um að greiða leiðina fyrir lækna að fá undanþágulyfseðla vegna þess.

„Það er verið að taka lyfið af markaði á heimsvísu,“ segir hún. „Auðvitað er skiljanlegt að það er erfitt fyrir sjúklinga að skipta um nafn á lyfjunum sínum, en það er því miður ekkert annað í stöðunni í þessu tilfelli.“

Trilafon í stunguformi verður áfram á markaði, sem og forðalyfið sem er gefið í stærri skömmtum.

Um 3.000 einstaklingar þjást af geðklofa hér á landi. Algengustu einkennin eru ranghugmyndir, ofskynjanir, hugsanatruflun og tilfinningaflatneskja. Lyfjameðferð með geðrofslyfjum er talin ein virkasta meðferðin við sjúkdómnum. sunna@frettabladid.is