Undanþágur inni í myndinni fyrir Nubo

Í drögum að samningi sveitarfélaga á Norðurlandi við fyrirtæki Huang Nubo kemur fram að hægt er að veita ýmsar undanþágur til nýtingar auðlinda. Fréttastofa hefur þessi óbirtu drög undir höndum.

Einkahlutafélagið GáF var stofnað í sumar af sveitarfélögum á Norðurlandi „til að undirbúa kaup, eignarhald og leigu" á hluta landsins Grímsstaða á Fjöllum. Þetta er félagið sem vill kaupa landið og leigja áfram til Zhongkun Grímsstaða, fyrirtækis Nubo.

Fréttastofa sagði frá því í gær að drögum að samningum milli þessara félaga hefði verið lekið og hefur fréttastofa fengið afrit af þeim.

Zhongkun hyggst samkvæmt samningsdrögum reisa hótel og byggja upp golfvöll, meðal annarrar þjónustu við erlenda ferðamenn.

Í drögum að afnotasamningi vegna segir að í skjóli eignarréttar GáF veiti það Zhongkun ýmis réttindi, svo sem rétt til hagnýtingar á vatni sem finnst á landinu, með fyrirvaranum:

„Ekki er um að ræða nýtingu vatns umfram þörf rekstrar og ekki til útflutnings eða sölu nema með samþykki GáF ehf. "

Þegar kemur að nýtingu á auðlindum í jörðu, segir:

„Ekki er um nýtingu að ræða umfram þörf uppbyggingarinnar og ekki til útflutnings eða sölu nema með samþykki GáF ehf. "

Þá eru fyrirvarar vegna nýtingar jarðhita á landinu:

„Ekki er um að ræða nýtingu jarðhita umfram þörf rekstrar sem Zhongkun Grímsstaðir ehf. verður með á jörðinni og ekki til sölu til þriðja aðila nema með samþykki GáF ehf. "

Eignarhaldsfélagið er skipað fimm stjórnarmönnum og tveimur til vara.

Í drögunum er fjallað um framsal afnotaréttar, og að fengnu samþykki GáF er Zhongkun Grímsstöðum frjálst að framselja afnotarétt af landinu.

Í samþykktum vegna stofnunar GáF er opið fyrir eigendaskipti á hlutum í félaginu. Þá er ekkert sem bannar sölu á félaginu í heild til einkaaðila.

Þar er einnig tekið sérstaklega fram að samþykktunum megi breyta á lögmætum aðalfundi, eða aukafundi með tveimur þriðju hlutum greiddra athkvæða.

Fréttastofa fjallar frekar um þetta mál á morgun.