Lýst eftir ökumanni

Lögreglan leitar nú ökumanns Mercedes Benz-bifreiðar sem ekið var á ljósgráan Skoda Octavia á Hafnarfjarðarvegi um tíuleytið í gærmorgun. Bílunum var ekið í suðurátt á Hafnarfjarðarveg en slysið átti sér stað við Álftanesveg.

Ökumaðurinn fór strax af vettvangi án þess að skeyta frekar um áreksturinn. Sást hann í framhaldinu aka Álftanesveg í vesturátt.

Skodinn er nokkuð skemmdur að sögn lögreglu og Benzinn einnig en hann er talinn vera ljósbrúnn og gæti verið árgerð 1989 til 1992.

Þeir sem búa yfir vitneskju um bílinn og ökumanninn eru vinsamlegast beðnir um að hafa samband við lögregluna á höfuðborgarsvæðinu í síma 444-1000.

Upplýsingum má einnig koma á framfæri á netfangið abending@lrh.is en lögreglan hvetur jafnframt ökumanninn til að gefa sig fram.