Helena með 29 stig á aðeins 21 mínútu

Helena Sverrisdóttir átti mjög flottan leik þegar Good Angels Kosice vann 110-42 sigur á MBK Región Roznava í slóvakísku deildinni um helgina. Good Angels Kosice vann þarna sinn fimmtánda sigur í röð í deildinni og er með fjögurra stiga forskot á MBK Ruzomberok.

Helena var í miklum ham í leiknum en hún skoraði 29 stig á aðeins 21 mínútu og var langstigahæst í liði Good Angels Kosice. Helena hitti úr 11 af 19 skotum sínum þar af 3 af 6 fyrir utan þriggja stiga línuna. Hún var einnig með 7 fráköst, 4 stoðsendingar og 4 stolna bolta auk þess að tapa bara einum bolta allan leikinn.

Helena jafnaði þarna sitt persónulega met í deildinni en hún skoraði einnig 29 stig í sigri á sama liði í lok nóvember. Helena er nú búin að skora 14,1 stig, taka 3,9 fráköst og gefa 3,8 stoðsendingar að meðaltali á 23,5 mínútum í leik í slóvakísku deildinni í vetur.