Smástirni á sömu sporbraut og jörðin

Bandarískir geimvísindamenn hafa uppgötvað lítið smástirni sem er á sömu sporbraut um sólina og jörðin. Þessi litli klettur mun fylgja jörðinni næstu tíu þúsund árin áður en hann þýtur á brott út í geim. Vísindamenn kalla þessi smástirni trójukletti.

Smástirnið er bundið af þyngdarafli jarðarinnar og sólarinnar og er því fast á sporbraut um stjörnuna.

Trójuklettar hafa fundist við pláneturnar Júpíter, Neptúnus, Mars og Satúrnus.

Ferðafélagi okkar er um það bil 300 metra breiður og er í rúmlega 80 milljón kílómetra fjarlægð frá jörðinni.