Arnór: Skemmtilegra en á æfingu

Arnór Atlason segir að leikurinn gegn Bretum í dag hafi ekki verið mjög þýðingarmikill. Aðalatriðið hafi verið að fá þessi tvö stig sem í boði voru.

„Við fengum tvö stig og það er það sem mestu skiptir. Við ætluðum að nota þennan leik eins og góða æfingu og það var allavega skemmtilegra að gera það en að hlaupa fram og til baka í einhverri höll úti í bæ," sagði Arnór.

Stemningin í Koparboxinu í kvöld var mögnuð en nú verður handboltakeppnin færð yfir í körfuboltahöllina. Strákarnir hafa þó notið sín vel í Koparboxinu enda unnið alla sína leiki þar.

„Það er búið að vera æðislegt að spila hérna og fullt á hverjum einasta leik. Það er því leiðinlegt að fara en það verður vonandi þá bara enn skemmtilegra á hinum staðnum og enn fleiri áhorfendur."

„Nú kemur leikur í átta liða úrslitum og höfum við beðið eftir því í allt sumar. Við erum tilbúnir og hlökkum mikið til."

Nú er ljóst að Ísland mætir Ungverjalandi í fjórðungsúrslitum. „Það er komið andlit á andstæðinginn í þessum leik sem við höfum verið að hugsa svo lengi um. Við þekkjum Ungverjana ágætlega og þurfum nú að nýta tímann fram að leiknum vel til að greina þeirra leik. Ég er viss um að sú vinna byrji strax í kvöld."

Arnór segir að lexían eftir þennan leik í kvöld sé einföld. „Ef við erum ekki á fullu þá getum við ekkert í handbolta. Þannig hefur það alltaf verið hjá íslenska landsliðinu. Það sýndi sig aftur í dag."

„En við unnum með nokkrum mörkum í kvöld og fengum aðeins að skjóta á þá. Þetta var því bara fínt."