Vond færð í aftakaveðri

Töluvert snjóaði allt frá Vestfjörðum og til Austurlands í nótt og var mikill skafrenningur og kóf í bálhvössum vindinum. Hann mældist yfir 60 metrar á sekúndu í hviðu í Hamarsfirði við Djúpavog í gærkvöldi og víða mældist hann yfir 50 í hviðum.

Björgunarsveitir voru kallaðar út á nokkrum stöðum til að aðstoða vegfarendur í vandræðum, og til að hefta fok á Höfn og í Norðfirði. Einnig til að hemja þak á húsi í Mosfellsbæ, hemja báta í höfninni á Seyðisfriði og aftur til að hemja húsþak í Mosfellsbæ  núna undir morgun.  Rafmagn fór af hluta Snæfellsness í gærkvöldi en er aftur komið á.

Flest allir fjallvegir eru ófærir og illa horfir með innanlandsflug þannig að segja má að samgöngur milli landshluta séu nánast lamaðar. Víða er líka þæfingsfærð í byggð, eins og til dæmis á Akureyri. Ekki er vitað um nein slys eða umtalsverð óhöpp, enda var umferð allstaðar í algjöru lágmarki, að sögn lögreglu. 

Innan við 40 fiskiskip eru á sjó, og eru þau flest í vari. Þetta er með því fæsta sem orðið hefur, utan fría um jól, páska og sjómannadag. Skólahald hefur víða verið fellt niður á óveðurssvæðunum í dag. -Áfram er spáð stormi á landinu.-