Borgin þurfi flugvöll til að sinna skyldum sínum

Greiðar flugsamgöngur landsbyggðarinnar til Reykjavíkur eru forsenda þess að borgin geti gegnt hlutverki sínu sem höfuðborg landsins alls. Þetta segir í bókun sem bæjarstjórn Akureyrar samþykkti á fundi sínum í gær þar sem rædd var nýútkomin skýrsla KPMG um áhrif þess að færa flugvöllinn úr Vatnsmýri.

Bæjarstjórn Akureyrar minnir í bókuninni á að í höfuðborginni séu höfuðstöðvar stjórnsýslu Íslands auk fjölda opinberra viðskipta-, mennta-, menningar- og heilbrigðisstofnana sem eiga þar einnig sínar höfuðstöðvar. Þá segist bæjarstjórnin hvetja borgarstjórn Reykjavíkur til að hafa framangreind atriði í huga við umfjöllun um framtíðarstaðsetningu flugvallarins.