Verulegar olíulindir gætu verið við Jan Mayen

Olíu- og orkumálaráðherra Noregs, Ola Borten Moe, segir að á Jan Mayen-svæðinu gætu verið verulegar olíu- og gaslindir. Þetta kemur fram í yfirlýsingu ráðherrans í tilefni þess að umhverfismat vegna olíuleitar í lögsögu Noregs á svæðinu er nú komið í opið umsagnarferli.

Næstu þrjá mánuði, til 16. janúar 2013, býðst almenningi, félögum og stofnunum að senda inn athugasemdir, en umhverfismatið er liður í þeirri stefnumörkun norskra stjórnvalda að opna svæðið til olíuvinnslu. Þegar umhverfismatinu lýkur hyggst ríkisstjórn Noregs leggja fyrir norska stórþingið áætlun þar sem nánar verður mælt fyrir um olíuleitina.

Olíustofnun Noregs hefur undanfarin ár, í samstarfi við Orkustofnun Íslands, staðið að víðtækum jarðfræðirannsóknum á Jan Mayen-hryggnum og hafa þær náð inn í íslensku lögsöguna, þann hluta sem Íslendingar nefna Drekasvæðið. Snemma á þessu ári greindu stofnanirnar sameiginlega frá því að skýr merki olíu hefðu fundist Íslandsmegin í sýnum sem náðust af hafsbotni með fjarstýrðum kafbáti og í fyrra var staðfest að berglög á svæðinu gætu varðveitt olíu og gas.