Fjögurra mánaða fangelsi fyrir kannabisrækt

Karlmaður var í dag dæmdur í fjögurra mánaða fangelsi í Héraðsdómi Suðurlands í dag fyrir að hafa haft tæplega 100 kannabisplöntur í vörslu sinni í Smáratúni. Fíkniefnin fundust við húsleit lögreglu í byrjun apríl. Maðurinn mætti við þingfestingu málsins og lýsti yfir að hann óskaði ekki eftir skipun verjanda. Ákærði viðurkenndi skýlaust að hafa gerst sekur um þá háttsemi sem honum er gefin að sök í ákæru. Samkvæmt sakavottorði hefur maðurinn ellefu sinnum áður sætt refsingu, þar af fjórum sinnum fyrir brot á ávana- og fíkniefnalöggjöf.