Félögin fóru fram á frestun | Keflavík óttast ekki kuldann

Birkir Sveinsson, mótastjóri KSÍ, segir að ákveðið hafi verið að fresta leikjunum tveimur í Pepsi-deild karla í kvöld þar sem félögin báðu um það.

Að sögn Birkis óttuðust félögin að veðrið í kvöld myndi fæla áhorfendur frá því að mæta á völlinn.

Keflvíkingar hafa aftur á móti tröllatrú á sínu fólki og báðu því ekki um neina frestun.

Það er ekki spáð neinu aftakaveðri í kvöld. Hiti er fyrir ofan frostmark en þó má búast við nokkurri vindkælingu. Spáin á morgun er skömminni skárri en það verður þó ekkert Mallorca-veður.

Aðspurður hvort félög gætu farið að fresta leikjum ítrekað vegna mislæmrar veðurspár í sumar sagði Birkir.

"Ég segi það nú ekki. Við metum hvert tilvik fyrir sig og það var mögulegt að verða við óskum að þessu sinni," sagði Birkir.