Tónleikamaraþonið hafið

Tólf klukkustunda tónlistarveisla verður í boði fyrir gesti Kex Hostel í dag en meðal annarra koma fram íslensku hljómsveitirnar Hjálmar og Tilbury. Tónleikarnir verða teknir upp og munu hljóma í bandarísku útvarpi.

Tónleikarnir eru haldnir í samstarfi við útvarpsstöðina KEXP í Seattle í Bandaríkjunum sem hefur verið iðin við að leika íslenska tónlist og hefur meðal annars sent beint ú frá Airwaves tónlistarhátíðinni. Tónleikar dagsins fara í loftið vestanhafs í haust að sögn Baldvins Esra Einarssonar, viðburðastjóra Kex Hostel á Skúlagötu.

„Þetta verður allt tekið upp á myndband en þeir eru mjög iðnir við að búa til myndbönd fyrir Youtube með tónleikaupptökum frá allskonar hátíðum um allan heim og meðal annars Airwaves. Íslenskar upptökur hafa fengið mikið áhorf á Youtube vegna þeirra vinnu og það er náttúrulega bara frábært," segir Baldvin Esra Einarsson viðburðarstjóri Kex Hostel.

Hljómsveitin Hjálmar hefur leik klukkan tólf í dag og á eftir þeim stígur Tilbury á svið klukkan eitt.

„Þetta mun standa yfir í tólf tíma og enda rétt fyrir miðnætti með tónleikum með Ghost Digital. Þeir voru að gefa út plötu og eru ólmir í að spila fyrir fólk og okkur fannst við hæfi að hafa þá síðasta," segir Baldvin en alls koma tólf hljómsveitir fram á maraþon tónleikunum í dag.

Baldvin er fullviss um að dagurinn verði góður, hljómsveitirnar leika úti undir berum himni á palli staðarins og aðgangur á tónleikana er ókeypis.