Hreiðar Levý: Þurftum að hafa mikið fyrir sigrinum

„Ég verð eiginlega að fá að leiðrétta þig. Ég varði víti OG frákast þegar ég kom inn á," sagði glaðbeittur Hreiðar Levý Guðmundsson eftir sigurinn á Argentínu í dag.

Hreiðar hafði auðvitað rétt fyrir sig. Hann kom inn á fyrir Björgvin Pál Gústavsson til að verja vítakast snemma í seinni hálfleik en gerði sér lítið fyrir og varði skot sem kom eftir frákastið.

Hreiðari var svo aftur skipt inn á þegar 20 mínútur voru eftir og átti hann eftir að loka búrinu með því að verja tólf skot, þar af tvö víti til viðbótar.

„Það verður að segjast eins og er að þetta var mjög gott. Ég er afar ánægður með þessa byrjun," sagði hann enn fremur. „En það er mikilvægast að fá sigur og tvo punkta. Það er aukaatriði hvernig það gerðist. Argentína er með gott lið og þetta var góður sigur. Við þurftum að hafa mikið fyrir þessu."

Markverðirnir áttu báðir góðan dag og ekki hægt að kvarta undan markvörslunni. „Þetta var gott og vonandi verður áframhald á því. Við Bjöggi reynum að tækla þetta eins vel og við getum. Markvarslan er mikilvæg og getur breytt leikjum - það vitum við vel."



„Við erum í góðum fíling og vonandi breytist það ekkert."