Verðlaunahafar í ljósmyndakeppni Vísis og WOW

Gríðarleg þátttaka var í ljósmyndakeppni Vísis og WOW Air sem fór fram í júní. Alls bárust inn um fjögurþúsund myndir og skiptust þær í þrjá flokka, náttúru, fólk og húmor. Þær tíu myndir sem fengu flest like í hverjum flokki fóru í úrslit og það var fagnefnd skipuð ljósmyndadeild Fréttablaðsins og Vísis, fulltrúum Vísis og WOW Air sem valdi á milli þeirra.

Vinningsmyndin í flokknum „fólk" heitir „Segðu SÍS" og er tekin af sex mánaða stúlku, sem er í kafi í ónefndri sundlaug. Í fyrstu frétt um málið kom fram að ljósmyndarinn væri Sandra Mjöll Ólafsdóttir, sem er móðir fyrirsætunnar. En í ljós kom að málið var ekki svo einfalt. Þannig var það ljósmyndarinn Eyþór Árnason sem tók myndina, en seldi foreldrum fyrirsætunnar myndina. Því kom upp ákveðinn misskilningur. Sá misskilningur var þó leystur farsællega, því Eyþór fékk einnig verðlaun, tvo flugmiða hjá WOW air, og deilir því sigursætinu með litlu fyrirsætunni. 

Vinningsmyndin í flokknum „náttúra" heitir „hljóp út" og er tekin við Kaldbak skammt frá Húsavík. Ljósmyndarinn var Alva Kristín Kristínardóttir.

Vinningsmyndin í flokknum „húmor" heitir „dóttir og faðir í sjálfheldu" og er tekin af föður og dóttur á leið heim úr brúðkaupi á hjóli, þar sem þau komust ekki langt. Ljósmyndarinn var Kristín Ósk Bjarnadóttir.

Allir vinningshafarnir fá miða fyrir tvo á einhvern af áfangastöðum WOW Air.