Vissu ekki að þau væru "týnd" - ætla að halda áfram för sinni

„Það var allt í góðu hjá þeim og ákváðu að halda áfram för sinni," segir Einar Eysteinsson, hjá slysavarnafélaginu Landsbjörg. Þýsku hjónin sem leitað hefur verið að síðan síðdegis í gær komu í leitirnar í morgun en það voru björgunarsveitarmenn sem fundu hjónin.

Einar segir að hjónin hafi ekki upplifað það sem svo að þau væru týnd. „Ferðaáætlun þeirra hafði bara aðeins breyst," segir Einar. Þau vissu ekki að viðbúnaðinum hjá slysavarnafélaginu en þyrlan leitaði í gær og í morgun að hjónunum og þá voru björgunarsveitir ræstar út í morgun.

Hjónin fundust á göngu á gönguleiðinni milli Engjasels og Múlaskála og segir Einar að þau ætli að halda áfram suður í Lón.