Vill spara hundruð milljóna með rafrænni þjónustu

Karl Björnsson, framkvæmdastjóri Sambands íslenskra sveitarfélaga, telur að Íslendingar ættu að vinna af fullri alvöru að taka upp rafrænar kosningar. Framkvæmd kosninga sé gamaldags og miðað við þá tækni sem er til staðar sé hægt að auka möguleika á þessu sviði og spara hundruð milljóna.

Í leiðara Karls í blaðinu Sveitarstjórnarmál vekur hann athygli á rafrænum kosningum. Í samtali við fréttastofu segir Karl að Samband íslenskra sveitarfélaga hafi fullan hug á því að vinna að framkvæmd rafrænna kosninga á næstu árum. „Við eigum að kanna alla möguleika á að auka rafræna þjónustu í opinbera geiranum. Ríkisskattstjóri er kominn mjög framarlega í þessu, það er mjög gott dæmi um hvernig hægt er að þróa þetta áfram á þennan hátt," segir Karl en þar vísar hann í hvernig fólk getur skilað skattaskýrslu á internetinu.

Hann segir að margar kosningar séu framundan á næstu árum og það kosti hundruð milljóna. „Ég held að við gætum sparað gríðarlega mikla peninga þegar fram í sækir. Vissulega væri einhver stofnkostnaður en þetta myndi alltaf skila sér til baka. Bara það að fækka bréfasendingum spörum við okkur hundruð milljóna til langs tíma," segir Karl.

Samkvæmt upplýsingum frá innanríkisráðuneytinu er gert ráð fyrir að þjóðaratkvæðagreiðsla um tillögur stjórnlagaráðs í haust kosti 250 milljónir króna, svo dæmi séu tekin.

Karl segir að það hljóti að vera komið að þeim tímapunkti að ríki og sveitarfélög taki höndum saman og leitist við að tölvuvæða kosningar hér á landi og auka þannig rafræna þjónustu. „Það eru ótal tækifæri til að þróa á þessu sviði."

Ögmundur Jónasson, innanríkisráðherra, hefur í samvinnu við Samband íslenskra sveitarfélaga skipað stýrihóp til að fjalla um rafræna stjórnsýslu. Hópurinn hefur haldið þrjá fundi en í þeim eiga fjölmargir aðilar sæti, til dæmis tveir fulltrúar frá Sambandi íslenskra sveitarfélaga.

Leiðara Karls í blaðinu Sveitarstjórnarmál má lesa hér.