Aldrei meiri áhugi á sumarbústaðalóðum í Grímsnesi

Sjaldan eða aldrei hefur verið jafnmikill áhugi á sumarbústaðalóðum í Grímsnesi eins og nú, þrátt fyrir allt tal um efnahagskreppu. Oddviti sveitarfélagsins segir þetta koma skemmtilega á óvart. Fjölmargir bústaðir eru í byggingu og biðlisti er eftir lausum lóðum.

Í Grímsnesi og Grafningshreppi eru um þrjú þúsund sumarbústaðir og fer þeim sífellt fjölgandi. Á síðustu vikum hefur Byggingarnefnd úthlutað 17 lóðum undir bústaði og fjölmargir nýir bústaðir eru í byggingu vítt og breitt um Grímsnesið.

„Það er nú talsvert verið að byggja af semsagt nýjum eignum og þá sérstaklega verið að þétta byggðina í þessum eldri hverfum. En það er talsvert líka af byggingum á aukahúsi, gestahúsi. Þannig það er heilmikið í gangi," segir Gunnar Þorgeirsson, oddviti Grímsnes- og Grafningshrepps.

„Ég held það sé ekki verri sparnaður hjá fólki ef það á pening, að setja það í fallegt sumarhús, því þau virðast haldast vel í verði, alla vega í okkar samfélagi," segir hann.

Gunnar segir að nýir bústaðir stækki og stækki enda allt meira eða minna heilsárs hús. Meðalstærðin á nýjum sumarbústöðum er á um 120-160 fermetrar.

„Þetta er náttúrlega byggt eftir ítrustu stöðlum, bara nánast eins og einbýlishús. Með steyptum plötum og hita í gólfi og öllu sem því fylgir," segir Gunnar.

Gunnar segir að þessi mikli áhugi á nýjum sumarbústöðum og bústaðalóðum komi skemmtilega á óvart í öllu talinu um efnahagskreppu landsins.

„Ég sé það að allar lóðir sem eru til sölu í byggðum hverfum þær fara eiginlega alveg um leið," segir Gunnar.

Svo þetta selst allt eins og heitar lummur?

„Klárlega," svarar Gunnar.

Og oddvitinn brosir breitt?

„Já hann er mjög ánægður," segir Gunnar og hlær.