Jóhannes Karl semur við ÍA um helgina

Skagamenn staðfestu í dag að Jóhannes Karl Guðjónsson sé búinn að semja um starfslok við Huddersfield og muni skrifa undir þriggja ára samning við ÍA um helgina.

Jóhannes Karl ætti því að vera klár í bátana þegar Pepsi-deildin fer í gang.

Nokkuð er síðan ákveðið var að Jóhannes kæmi til ÍA í sumar. Hann fékk aftur á móti óvænt tækifæri hjá Huddersfield er liðið skipti um þjálfara.

Jóhannes lék vel fyrir liðið og komst sá orðrómur í gang að Jóhannes kynni að vera áfram í Englandi. Af því verður ekki.