Ósáttur við fullyrðingar Ástu

Björn Valur Gíslason, formaður fjárlaganefndar Alþingis, er óánægður með fullyrðingar og málflutning Ástu Ragnheiðar Jóhannesdóttur, forseta Alþingis í fréttum að undanförnu. Ríkisútvarpið greindi frá því í gær að forseti Alþingis og ríkisendurskoðandi hefðu ákveðið að óska eftir því að erlend endurkoðunarnefnd flýtti úttekt sinni á Ríkisendurskoðun. Björn Valur taldi að með þessari ákvörðun hefði Ásta hunsað Alþingi. Í fréttum RÚV sagði hann að ákvörðunin hefði verið einleikur Ástu og sagðist ekki vita til þess að Ásta hefði haft samband við neinn annan þingmann vegna hennar. Þessu vísaði Ásta alfarið á bug. Hún sagðist hafa haft samráð við marga þingmenn og að Björn Valur hefði sjálfur verið einn þeirra. Hverjir voru þingmennirnir? Björn Valur neitar því í fréttatilkynningu að Ásta hafi haft samráð við hann. "Forseti hafði fyrst samband við mig símleiðis 5 mínútum áður en tilkynningin var send út og las hana þá upp fyrir mig í símanum," segir hann. "Mér er ekki kunnugt um hvort eða þá hvaða þingmenn forseti Alþingis ráðfærði sig við áður en hún tók ákvörðun sína," heldur Björn áfram og telur eðlilegt að hún upplýsi um hverjir það hafi verið og hvernig því samráði var háttað. Björn hefur farið fram á að Ásta dragi til baka rangar fullyrðingar um að hún hafi haft samráð við sig í aðdraganda ákvörðunarinnar.