Vilja konur í framboð

Landssamband sjálfstæðiskvenna hvetur konur í öllum flokkum til að bjóða sig fram til áhrifa í stjórnmálum.

„Það er farsælast fyrir land og þjóð að bæði kynin hafi áhrif á hvernig samfélagið okkar er byggt upp," segir í tilkynningu. „Við fögnum þeim konum sem þegar hafa gefið kost á sér og hvetjum fleiri til að gera slíkt hið sama."

Landssamband sjálfstæðiskvenna telur þáttöku kvenna í stjórnmálum til jafns við karla nauðsynlega til að tryggja sigur Sjálfstæðisflokksins í þingkosningunum.

Sjálfstæðiskonurnar skora einnig á ríkisstjórnina að leiðrétta þær breytingar sem hún hefur gert á lögum sem valda því að nú taka mun færri karlar fæðingarorlof en áður. Breytingarnar eru slæmar að mati Landssambandsins vegna þess aukin tækifæri karla til að taka fæðingarorlof voru eitt stærsta framfaraskref í baráttunni um að jafna stöðu kynjanna á vinnumarkaði.

Sjálfstæðiskonurnar hvetja fyrirtækin í landinu til að nýta krafta kvenna jafnt sem karla til að endurreisa íslenskt atvinnulíf. Og að lokum álykta þær að kynbundinn launamunur sé mein sem tafarlaust þurfi að uppræta og mikilvægt sé að Sjálfstæðisflokkurinn beiti sér í því máli.