Taphrinan á enda - Helgi Már með 27 stig

Helgi Már Magnússon og félagar í 08 Stockholm HR enduðu fimm leikja taphrinu sína í sænsku úrvalsdeildinni í körfubolta með ellefu stiga útisigri á botnliði ecoÖrebro, 91-80, í kvöld.

Helgi Már átti mjög góðan leik en hann skoraði 27 stig í leiknum þar af 15 þeirra í fyrri hálfleiknum þegar hann hitti úr 5 af 8 skotum sínum. Helgi var auk stiganna með 6 fráköst og 2 stoðsendingar. Helgi Már setti niður 5 af 8 þriggja stiga skotum sínum í leiknum.

08 Stockholm HR vann fyrsta leikhlutann 30-21, var með sex stiga forskot í hálfleik, 48-42, og leiddi með 11 stigum fyrir lokaleikhlutann, 73-62.

Síðasti sigur 08 Stockholm HR fyrir leikinn í kvöld kom á móti Uppsala Basket 24. janúar síðastliðinn.