Katrín með öflugan stuðning í Hafnarfirði - Gaukur vinnur fyrir Árna

Fangelsisstjórinn og fyrrverandi þingmaðurinn, Margrét Frímannsdóttir, hefur lýst yfir stuðningi við Katrínu Júlíusdóttur í prófkjöri Samfylkingarinnar í Suðvesturkjördæmi. Eins hefur Ágúst Einarsson fyrrverandi þingmaður og rektor hjá Bifröst, lýst yfir stuðningi við Katrínu.

Þetta kemur fram í stuðningsbæklingi sem liðsmenn Katrínar dreifa á heimili í kjördæminu í dag og á næstu dögum. Þar má einnig finna þungavigtarmenn úr Samfylkingunni í Hafnarfirði. Meðal annars Gunnar Svavarsson, fyrrverandi þingmann, Ingvar Viktorsson, Hafrúnu Dóru Júlíusdóttur og Jónu Dóru Karlsdóttur.

Það er því ljóst að Katrín hefur mikinn stuðning frá Hafnfirðingum fyrir prófkjörið næstkomandi helgi. Raunar skrifa 72 einstaklingar nöfn sín á stuðningslista Katrínar og má þar finna mörg þekkt nöfn víða úr kjördæminu. Þannig styður Magnús M. Norðdahl, varaþingmaður og lögfræðingur ASÍ Katrínu sem og Kristín Á. Guðmundsdóttir formaður Sjúkraliðafélagsins, en bæði eru þau úr Kópavogi.

Það er óhætt að tala um kosningaskjálfta þegar rætt er um prófkjörið í suðvesturkjördæmi. Í Fréttablaðinu í dag fer Kolbeinn Óttarsson Proppé fréttamaður yfir stöðuna í fréttaskýringu um kjördæmið, sem er það sterkasta hjá Samfylkingunni á landinu. Þar kemur fram að flokksfélagar í kjördæminu séu fimm þúsund, búið sé að skrá 150 nýja félaga inn í flokkinn í aðdraganda prófkjörsins og að 600 manns hafi skráð sig á þar til gerð stuðningslista sem gerir þeim kleyft að taka þátt í prófkjörinu.

Samfylkingarfélagið í Hafnarfirði er það sterkasta en félagið í Kópavogi hefur vaxið ásmegin síðustu ár. Það vekur því tvímælalaust athygli að Katrín skuli hafa dyggan stuðning úr Hafnarfirðinum, sem hún hefur raunar ávallt haft, en það má vera að úrslit prófkjörsins um 1. sætið ráðist þar. Bæði Katrín og Árni Páll eru úr kópavoginum.

Hitt er þó það, eins og Fréttablaðið greinir frá í dag, að Árni Páll Árnason, sem þegar situr í 1. sætinu, hefur hagað sinni baráttu af mikilli kostgæfni. Hann hefur meðal annars ráðið til sín kosningastjóra, en Vísir greindi frá því fyrir skömmu að hann hefði ráðið Ólafíu B. Rafnsdóttur, sem hefur verið kosningastjóri Ólafs Ragnars Grímssonar í gegnum tíðina sem og Ingibjargar Sólrúnar Gísladóttur. Í fáum orðum hefur Ólafía verið afar farsæl á þessum vettvangi.

Þá nýtur Árni Páll einnig, samkvæmt heimildum Vísis, aðstoðar Gauks Úlfarssonar, sem var oft kallaður spunameistari Besta flokksins, Steingríms Sævarrs Ólafssonar, fyrrverandi ritstjóra og upplýsingafulltrúa forsætisráðherra í ráðherratíð Halldórs Ásgrímssonar, og svo Símonar Birgissonar lista- og fréttamanns, sem tók meðal annars viðtal við Árna Pál fyrir framboðsmyndbönd sem Árni Páll hefur birt á heimasíðu sinni.