Hundruð atvinnulausra munu þurfa aðstoð frá borginni

Einstaklingum sem þurfa að þiggja fjárhagsaðstoð frá Reykjavíkurborg mun fjölga um mörg hundruð um áramótin. Ástæðan er sú að fólkið er búið að vera á atvinnuleysisbótum svo lengi að að réttur þeirra til bóta rennur út. Jón Gnarr borgarstjóri benti á þetta í umræðum um fjárlagafrumvarp Reykjavíkurborgar.

„Fyrr í þessum mánuði átti ég fund með fjárlaganefnd, ásamt formanni borgarráðs, borgarritara og fjármálastjóra. Þar röktum við ítarlega nokkra lykilþætti í þessum samskiptum og var minnisblað sem fjárlaganefnd fékk afhent kynnt í borgarráði 18. október sl. Í minnisblaðinu ber hæst þá miklu vá sem er fyrir dyrum með því að ekki stendur til samkvæmt fjárlögum að framlengja atvinnuleysisbótarétt. Við það mun einstaklingum sem þurfa að þiggja fjárhagsaðstoð frá Reykjavíkurborg fjölga verulega," sagði Jón Gnarr.

Hann benti á að samkvæmt gögnum frá Vinnumálastofnun frá því í september muni 788 reykvískir einstaklingar missa atvinnuleysisbótarétt strax um næstu áramót, ásamt 45 einstaklingum í janúar þegar miðað er við að bótaréttur verði að hámarki 36 mánuðir í stað 48. Auk þess benda gögn Vinnumálastofnunar til að 816 reykvískir einstaklingar muni missa atvinnuleysisbótarétt frá og með febrúar til ársloka 2013 og um 328 þátttakendur í Vinnandi vegi sem búsettir eru í Reykjavík. Fjöldi miðast við að einstaklingar muni ekki fá starf á almennum vinnumarkaði á tímabilinu."

„Í fjárhagsáætlun er gert ráð fyrir að heildarútgjöld til fjárhagsaðstoðar verði 3.934 mkr sem er hækkun um 1.086 mkr milli ára. Það er ljóst að grípa verður til aðgerða til að sporna við þessari þróun," sagði Jón Gnarr.