Þátttakan betri en í stjórnlagaþingskosningunum

Klukkan fjögur höfðu ríflega 20% þeirra sem eru á kjörskrá greitt atkvæði um tillögur stjórnlagaráðs að nýrri stjórnarskrá. Í Reykjavíkurkjördæmi suður höfðu 21,98% greitt atkvæði en í Reykjavík norður 22,97%. Á sama tíma höfðu 17,2% greitt atkvæði í kosningunum um stjórnlagaþing á sínum tíma.

"Þetta er allt að glæðast," segir starfsmaður yfirkjörstjórnar. Í morgun leit út fyrir að þátttaka yrði dræmari í kosningunum í dag en hún var í stjórnlagaþingskosningunni en smám saman hefur munurinn minnkað og ef fram fer sem horfir verður þátttaka í dag meiri en í stjórnlagaþingskosningunni á sínum tíma.