Mikilvægt að ráðast í virkjanaframkvæmdir á Suðurlandi

Nauðsynlegt er að fara í virkjanaframkvæmdir á Suðurlandi eins og Hagavatnsvirkjun í Bláskógabyggð og Hólmsárvirkjun í Skaftárhreppi, svo og Hvammsvirkjun og Holtavirkjun í neðri hluta Þjórsár segir Björgvin G. Sigurðsson, fyrsti þingmaður Suðurkjördæmis. Hann segist vera virkjanasinni.

Björgvin G. Sigurðsson flutti ávarp á ársþingi Samtaka sunnlenskra sveitarfélaga á Hellu í gær þar sem hann kom víða við í erindi sínu. Hann gaf sér góðan tíma til að ræða virkjanamál en hann er ósáttur við rammaáætlun ríkisstjórnarinnar í virkjanamálum.

„Ég er ekki sáttur við að eftir að tillögu verkefnastjórnarinnar var breytt þá voru í raun og veru teknir út flestir virkjanakostir á suðurlandi og settir í biðflokk. Eftir stóðu Hverahlíðavirkjun og Hellisheiðin í nýtingaflokki. Ég tel að við lokagerð rammaáætlunar í þinginu núna þá þurfi að færa þá kosti sem er samstaða um úr biðflokki í nýtingaflokk," segir Björgvin.

Björgvin vill líka sjá virkjanir sem fyrst í neðri hluta Þjórsár, þ.e. Hvammsvirkjun og Holtavirkjun.

„Ég tel að það verði alla vega farið í efri virkjanirnar tvær. En hins vegar voru málefnaleg rök fyrir því að ljúka rannsóknum á laxastofninum. Og það er ekkert því til fyrirstöðu að gera það áður en endanleg ákvörðun er tekin. En þar eins og annars staðar hafa sveitarfélögin beggja vegna Þjórsár afgreitt þetta mál fyrir löngu," segir hann.

Lítið sem ekkert er að gerst í atvinnumálum á Suðurlandi og því segir Björgvin mikilvægt að fá mannaflsfrek verkefni í gang. Hann vill að orkan á Suðurlandi sé sem mest nýtt á svæðinu.

„Það er algjört grundvallaratriði að ákvörðunum um nýjar virkjanir á Suðurlandi fylgi ákvörðun um að tiltekið hlutfall raforkunnar verði nýtt hér," segir hann.