Afgerandi stuðningur við frumvarp Stjórnlagaráðs

Afgerandi stuðningur er við frumvarp Stjórnlagaráðs, samkvæmt fyrstu tölum sem berast úr þjóðaratkvæðagreiðslunni í dag. Talin hafa verið öll atkvæði við fyrstu spurningunni á kjörseðlinum af sex í Suðvesturkjördæmi. Þar er niðurstaðan sú að 68% vilja að frumvarp Stjórnlagaráðs verði lagt til grundvallar að nýrri stjórnarskrá, en um 32% vilja það ekki. Þetta kom fram í aukafréttatíma RÚV.

Í Suðurkjördæmi er staðan svipuð. Um 61% vilja að frumvarp Stjórnlagaráðs verði lagt til grundvallar að nýrri stjórnarskrá en 39% vilja það ekki.

Staðan er líka áþekk í Norðausturkjördæmi. Þar vilja um 65% kjósenda að frumvarp Stjórnlagaráðs verði lagt til grundvallar að nýrri stjórnarskrá en 35% vilja það ekki.

Í Reykjavík suður vilja 68% að frumvarp Stjórnlagaráðs verði til grundvallar að nýrri stjórnarskrá en 28% vilja það ekki. Í Reykjavík norður vilja tæplega 74% að frumvarp Stjórnlagaráðs verði lagt til grundvallar en 22% ekki.

Heildarmyndin liggur þó ekki fyrir, því kosið er í sex kjördæmum og yfirkjörstjórnir í hverju kjördæmi hafa ólík vinnubrögð við talningu. Viðbúið er að heildarmyndin muni ekki liggja fyrir fyrr en seint í nótt eða jafnvel á morgun.

Eins og fram hefur komið á Vísi í dag var kjörsókn fremur dræm, en hún var um 50% þar sem hún var mest.