Alþingi á ekki að breyta tillögum stjórnlagaráðs

Þorvaldur Gylfason, meðlimur stjórnlagaráðs, heldur sig enn við þá skoðun að Alþingi eigi ekki að gera efnislegar breytingar á tillögum stjórnlagaráðs að nýrri stjórnarskrá. Í ljósi þess afgerandi stuðnings sem tillögurnar hlutu hjá þjóðinni er rétt að þær fari að mestu leyti óbreyttar gegnum þingið að hans mati.

Þorvaldur telur að Alþingi geti gert einhverjar breytingar á orðalagi. „En efnisbreytingar koma ekki til greina úr því að þjóðin hefur talað svona skýrt í þjóðaratkvæðagreiðslunni í gær," segir Þorvaldur.

Þorvaldur bendir á að nú er fjögurra manna lögfræðingateymi að fara yfir frumvarp stjórnlagaráðs fyrir Alþingi. „Þeim var falið að stinga upp á orðalagsbreytingum ef þörf væri á en þeim var skýrt uppálagt að stinga ekki upp á neinum efnisbreytingum því það er ekki þeirra hlutverk," segir Þorvaldur.

Hæstánægður með kjörsóknina

Þorvaldur er himinlifandi með niðurstöður þjóðaratkvæðagreiðslunnar. „Alþingi bað um leiðsögn og fékk eins skýra leiðsögn frá fólkinu í landinu og hugsast gat," segir hann.

Honum finnst kjörsóknin í gær ekki varpa neinum skugga á niðurstöðuna eins og einhverjir telja, en kjörsókn í gær var í kringum 50%.

„Það er mjög góð kjörsókn í atkvæðagreiðslu af þessu tagi. Þjóðaratkvæðagreiðslur um afmörkuð mál eru hálfgerðir munaðarleysingjar í þeim skilningi að þar hafa stjórnmálaflokkarnir enga frambjóðendur í kjöri. Þess vegna hafa þeir engan áhuga á að hvetja sitt fólk til að koma á kjörstað líkt og þeir verja miklum fjármunum til í alþingiskosningum. Svo þarna er ólíku saman að jafna," segir Þorvaldur.

Þorvaldur segir fróðlegt að líta til Sviss þar sem þjóðaratkvæðagreiðslur fara gjarna fram um afmörkuð mál. „Meðalkjörsókn í þeim er 45%," segir hann. „Miðað við þennan samanburð, sem ég tel mjög sanngjarnan, megum við vel við una."

Spurningin um þjóðkirkjuna skipti langminnstu máli

Þjóðin virðist hafa verið sammála tillögum stjórnlagaráðs að öllu leyti nema því að flestir vilja hafa ákvæði um þjóðkirkjuna í stjórnarskránni, öfugt við það sem stjórnlagaráð lagði til. Þorvaldur segir að sú spurning hafi í raun skipt minnstu máli í atkvæðagreiðslunni.

„Þetta þýðir bara að Alþingi gerir mjög einfalda breytingu á tillögunum, tekur út kirkjuákvæðið úr frumvarpinu og hefur kirkjuákvæðið sem er í núgildandi stjórnarskrá," segir hann. „Þetta er minniháttarfrávik. Ef það hefði verið frávik í hinum spurningunum hefði þurft að gera veigamiklar breytingar á tillögunum sem hefði verið mjög vandasamt. Alþingi hefur núna fengið skýr skilaboð um að það er ekki tilefni til slíkra breytinga."