Notar eigin verðlaunapumpu en gefur ekkert upp um sentímetra

Íslenskt hugvit vekur enn á ný heimsathygli, nú fyrir hönnun á hjálpartæki ástarlífsins fyrir karlmenn. Tækið var sett á markað í sumar og selst víst eins og heitar lummur.

Töfratækið er vatnspumpa til að nota í sturtu, þar sem karlmenn geta fylgjast með því hvort fermingarbróðirinn bætir við sig einhverjum sentimetrum.

Ágúst Smári er nýkominn frá Þýskalandi þar sem hann tók við Venus-verðlaununum sem þykir mikill heiður að hljóta.

„Við fengum þessi glæsilegi verðlaun fyrir besta typpastækkarann 2012, þó svo hann sé nú búinn að vera í þróun í þrjú ár. Við komum með þetta á markað fyrst í júní og hann er búinn að seljast eins og heitar lummur í Bandaríkjunum, Ástralíu, Kóreu, og núna eftir að þetta kom á mbl.is um helgina þá varð allt vitlaust hérna heima. Þetta er allt búið bara, það er ekki til eitt eintak í landinu," segir Ágúst Smári Beaumont, talsmaður AVK ehf. á Íslandi.

Hann segir að til að ná árangri þurfi að nota pumpuna helst daglega.

„Já, þú verður að gera það, þetta er bara eins og með vöðvana, þú þarft að fara í ræktina til að ná árangri," útskýrir Ágúst brosandi.

Ágúst starfar meðal annars hjá fjölskyldufyrirtækinu AVK, sem er í eigu móður hans, en fyrirtækið hefur áður markaðssett hér á landi svokallaðar gleðimúffur fyrir karlmenn, og typpastækkarann Bathmate sem vakti mikla athygli.

„Þetta er íslenskt hugvit, já. Við erum tveir, það er auðvitað ég og svo er einn íslenskur verkfræðingur sem starfar hjá Penomet í Bandaríkjunum sem hannaði þetta," segir Ágúst. Spurður hvaða þýðingu verðlaunin hafi fyrir fyrirtækið svarar Ágúst einfaldlega: „Við eigum eftir að selja miklu miklu meira."

Þú talar af reynslu? Þú notar þetta sjálfur?

„Já, en ég er nú svolítið feiminn," segir hann hlæjandi. „Ég ætla ekki að fara að segja þér sentimetrana..."