Vissara að standa ekki fyrir aftan kýr með veiruskitu

„Þetta er ekkert ósvipað og inflúensa hjá mönnunum, fyrir utan að þetta kemur í fljótandi formi og þá er vissara að vera ekki fyrir aftan," útskýrði Daníel Magnússon, bóndi á Akbraut norðan Hellu sem ræddi við Reykjavík síðdegis um veiruskitu sem kom upp í kúm á býlinu hans fyrir um tveimur vikum síðan.

Vísir greindi frá því fyrr í dag að veiruskita í kúm hefur stungið sér niður á nokkrum kúabúum á Suðurlandi, sem veldur því að kýrnar missa nyt og því verður um mikið afurðartap hjá bændum á ræða. Dýralæknir hjá Matvælastofnun biður bændur að vera ekki að þvælast að óþörfu á milli bæja með tæki og tól. Veikin gengur yfir á viku til tíu dögum.

Veikin hefur kvalarfull áhrif á kýrnar að sögn Daníels, en þær halda engu niðri, og þá er vissara að vera ekki fyrir aftan þær eins og hann útskýrði hér á undan: „þetta kemur bara einn, tveir og þrír. Það er eins og það gusist bara út úr slöngu."

Daníel sagði erfitt að horfa upp á kýrnar með veiruskituna, enda augljóslega kvalarfull veira fyrir dýrin. Hann segir þær missa mjólkina en veiran hafi þó engin áhrif á mjólkina sjálfa, þvert á móti verður hún vítamínríkari fyrir vikið.

Hægt er að hlusta á viðtalið við Daníel hér fyrir ofan.