Sofnaði á leið yfir götu

Lögreglan kom í vikunni að hreyfingarlausum manni sem stóð úti á miðri götu í miðborginni og studdi sig við reiðhjól. Maðurinn skapaði talsverða hættu í umferðinni og var því beðinn að færa sig. Maðurinn tók engum fyrirmælum en stóð kyrr í sömu sporum svo lögregluþjónar héldu einna helst hann væri heyrnarlaus. En þegar lögreglan kom fast upp að manninum kom á daginn að hann var steinsofandi úti á miðri götunni.

Maðurinn var því vakinn og honum gert að finna sér heppilegri hvíldarstað. Hann er kominn yfir miðjan aldur og ekki þykir ólíklegt að hann hafi fengið sér örlítið í tána fyrir þennan eftirminnilega göngutúr.

Maðurinn var furðuhress þegar hann hafði náð áttum en ekki er vitað hversu lengi hann svaf úti á götu. Lögreglan telur ósennilegt að hann hafi farið um langan veg á reiðhjólinu, en ástand þess gaf til kynna að það væri svo gott sem ónýtt. Fátt var um svör þegar maðurinn var beðinn að útskýra ferðalag sitt. Lögreglan sá hins vegar til þess að hann færi beint heim til sín til frekari hvíldar - svona öryggisins vegna.