Start hnappurinn horfinn í Windows 8

Start hnappurinn er horfinn og öll tæki komin með sama viðmót í nýjustu uppfærslu af hinu sívinsæla Windows stýrikerfi. Framkvæmdastjóri Microsoft á Íslandi segir breytingarnar vera svarið við aukinni samkeppni frá Apple.

Stýrikerfið Windows 8 kom á markað á föstudaginn en það leysir af hólmi eitt mest selda stýrikerfi allra tíma Windows 7. Það er með gjörbreyttu viðmóti sem flestar nýjar borð og fartölvur auk snjallsíma og spjaldtölva munu keyra héðan í frá. Grunnurinn er svokallaður start skjár en engan start hnapp er að finna í nýju uppfærslunni.

„Grundvallarhönnunarmunurinn er sá að við erum með þessar flísar og þessar flísar eru ekki fastar táknmyndir, heldur lifandi og stöðugt að birta uppfærslur af því sem er að gerast. Fyrir augum okkar eru uppfærslur sem við myndum hugsanlega ekki taka eftir eða upplýsingar sem við erum að leita að," segir Halldór Jörgensen, framkvæmdastjóri Microsoft á Íslandi.

Nýja kerfið er hannað með snertiskjái í huga og segir Halldór þá þróun vera ríkjandi í nýjustu tölvunum á markaðnum.

„Þetta er bæði umhverfi til þess að geta verið með í leik og starfi. Það sameinar það að vera með snertiskjá upplifun, skoða myndir og hlusta á tónlist og vafra, en líka geta skellt sér í vinnuna allt í sama tækinu."

Hann segir að með stýrikerfinu sé Microsoft að notendavæða sína upplýsingatækni en þeir hafi aðeins dottið afturúr samkeppni við Apple á undanförnum árum.

„Eigum við ekki bara að þakka þeim sem komu þessari byltingu af stað með snertiskjána. Við verðum að vera með til að taka þátt í því líka og ég held að við verðum ekki eftirbátur í því."