Veturinn kemur á morgun

Veturinn kemur á morgun. Þetta staðfestir Óli Þór Árnason, veðurfræðingur á Veðurstofu Íslands, í samtali við Vísi. „Það má alveg orða það þannig og það virðast alveg verða umhleypingar í kjölfarið á þessu," segir Óli Þór. Í fréttatilkynningu sem Veðurstofan sendi frá sér í morgun kemur fram að búist er við vondu veðri á Norðurlandi frá og með seinni hluta morgundagsins, með töluverðri ofankomu.

Óli Þór segist búast við því að hér sunnanlands verði þurrt, kalt og hvasst. Aftur á móti verði engin ofankoma að ráði. „Það er aldrei hægt að útiloka að það dragist ekki einhver korn hérna yfir hálendið og upp í Borgarfirði og jafnvel í uppsveitir Suðurlands en það ætti að vera minniháttar," segir hann. Óli Þór segir að víðast hvar á landinu, norðanlands, sem sunnanlands verði vindurinn 13-20 metrar á sekúndu. Víðast hvar nær 13 metrunum þó.

Óli Þór segir að veðrið núna sé ekki tengt fellibylnum Sandy sem nú er að ganga yfir Bandaríkin. „Það er frekar eitthvað sem gæti komið eftir helgi. Það er hlýr pakki sem gæti komið yfir landið ef spárnar ganga eftir og myndi gefa okkur suðvestanátt," segir hann.